اچھا لگتا ہے

                                                          ان کے در پر سر کو جھکانا اچھا لگتا ہے  

 ہوش میں رہ کر ہوش گنوانا اچھا لگتا ہے                                 
                                                           ذوقِ  نظارہ  اور  بڑھانا  اچھا  لگتا  ہے
جا  کر  آنا  آ  کر جانا  اچھا  لگتا  ہے                                   
                                                            ہر  موسم  طیبہ  کا  سہانا  اچھا  لگتا  ہے
ہر   کوچہ   جانا  پہچانا  اچھا   لگتا   ہے                                     
                                                               ہستی کو اس طرح مٹانا اچھا لگتا ہے
خود کو کھو کر ان کو پانا اچھا لگتا ہے                                       
                                                               نسبت  پر  اپنی  اترانا  اچھا   لگتا ہے
خود کو ان کا خادم کہلانا اچھا لگتا ہے                                     
                                                          اس در پر انوار کی بارش ہوتی رہتی ہے
ایسے جلووں میں کھوجانا اچھا لگتا ہے                                    
                                                        اپنے شہر میں اپنے بھی بیگانے لگتے تھے
ان کے شہر میں ہر بیگانہ اچھا لگتا ہے                                 
                                        ذکر ان کا سیرت ان کی نعت ان کی تعریف ان کی
پڑھنا  سننا  لکھنا  سنانا  اچھا  لگتا  ہے                                  
                                                 میرے آقا خواب میں میرے اک دن آینگے
خواب یہی پلکوں پہ سجانا اچھا لگتا ہے                              
                                                     ممکن ہے دریائے رحمت جوش میں آجائے
اپنے عصیاں پر شرمانا اچھا لگتا ہے                                  
عارفؔ مجھ کو دیکھ کے بس وہ اتنا فرمادیں
دیوانہ  ہے   یہ  دیوانہ   اچھا   لگتا   ہے
******

چلے

بحرِ غم میں پھر مسرت کے سفینے سے چلے                  پھر ہوائے لطف کے جھونکے مدینے سے چلے   
 کارواں  نذرانہء  الفت  کے سینے سے چلے                   ہم  سوئے  طیبہ  چلے  کتنے  قرینے  سے چلے    
ساقیء صہبائے کوثر ایک جام اس سمت بھی          بے خودی کی لہر دل میں جس کے پینے سے چلے
جوشِ رحمت اس طرف عصیاں کی کثرت اِس طرف       جب کبھی سونچا ندامت سے پسینے سے چلے
ہیچ  جیسے  ہوگئیں  دنیا  کی  ساری  نعمتیں                                  واقعہ اتنا تھا ہم ہو کر مدینے سے چلے
دیکھئے  پہچان  لیجے  کس  سے  وابستہ  ہیں  ہم           اپنی  نسبت  کا  پتہ  خود  اپنے  جینے  سے  چلے
تجھکو عارفؔ خوف کیا ہو عرصہء محشر کا گر
ساتھ تیرے شافعِ محشر مدینے سے چلے
*****

نعتِ سرورِ کائنات ﷺ

                                               کتنی  عظیم  مرتبت  کیسی  بڑی  یہ  شان  ہے                      خاکِ  درِ  رسول  کا  ہر  ذرہ  آسمان  ہے                                                              

آمدِ مصطفیٰ  ہوئی  نورِ  یقین  آ گیا            ریب و گمان یوں مٹے ریب ہے نہ گمان ہے                       
                                            آپ سے رونقِ حیات آپ کے دم سے کائنات           آپ ہیں جاں جہان کی جان ہے تو جہان ہے
نقشِ قدم جہاں ملے سر کو وہیں جھکادیا         اپنی یہی ہے آبرو‘ آن ہے اور  شان ہے                     
                                         قسمت مری کہ مل گیا دامنِ مصطفیٰ مجھے            میرے لئے یہ حشر کی دھوپ میں سائبان ہے
کٹتے نہیں ہیں روز و شب لوٹ کے در سے آپ کے    پھر آرزوئے حاضری دل میں مرے جوان ہے
                                       وحشتِ دل شبِ سیہ ہمدم نہ کوئی ہمنوا                            ایک نظر ہو یا نبی سخت یہ امتحان ہے
انکا میں ہوچکا تو پھر خوف کی کوئی بات کیا                       میرے وہ ہوگئے تو پھر میرے لئے امان ہے
                                         انکا  کرم  جو  ہو  مری  ناؤ  تو  پار  ہوچکی        طوفاں کا کوئی غم نہیں موج ہی پاسبان ہے     
وابستہ در سے آپ کے عارف ؔ کمتریں بھی ہے
جنت  سے  بھی  سوا  اسے  آپ  کا  آستان  ہے
******

بس اتنا صلہ دینا

                                                          مجھکو مری نسبت کا بس اتنا صلہ دینا
گم گشتہء منزل ہوں قدموں میں جگہ دینا                                    
                                                  اک پردہ جو حائل ہے اس کو بھی اٹھا دینا
دیدار کی خواہش ہے دیدار کرا دینا                                           
                                                  کچھ ایسا شرف مجھکو ائے میرے خدا دینا
ہستی کو مری انکی چوکھٹ پہ مٹا دینا                                          
                                                          محویتِ کامل کو اس اوج پہ لا دینا
یاد ان کو کیا کرنا اور خود کو بھلا دینا                                         
                                                      جو ان کا ہوا اس کو پلکوں پہ بٹھا لینا
جو ان کا نہیں اس کو نظروں سے گرا دینا                               
                                       یوں تو مری رگ رگ میں ہے عشقِ نبی لیکن
یا رب تو اس آتش کو کچھ اور ہوا دینا                                    
                                                 عشقِ شہ طیبہ میں اک کیف کا عالم ہے 
بیخود ہوں مجھے میرا کچھ بھی نہ پتہ دینا                                   
                                                   تم خلقِ مجسم ہو تم پیکرِ رحمت ہو
آسان نہیں ورنہ دشمن کو دعا دینا                                        
                                              مانا کہ گناہوں سے دفتر ہے سیہ لیکن
وابستہء دامن ہوں بس اس کو نبھا دینا                                  
                                             سرکار نظر آئیں جب عرصہء محشر میں
ہر سمت درودوں کا اک حشر اٹھا دینا                                    
جب بھی کبھی چھائی ہو پژمردہ فضا عارفؔ 
سب جھوم اٹھیں ایسی اک نعت سنا دینا
******

گہرائی

الفت نبی کی قلب کی گہرائیوں میں ہے
تقدیر اپنی عرش کی اونچائیوں میں ہے
۔۔۔۔۔
وابستہ ان سے جو ہے پذیرائیوں میں ہے
جو ان سے دور ہوگیا رسوائیوں میں ہے
۔۔۔۔۔
نسبت جِلا جو پائے تو ہو ربط بھی قوی
یہ لطف ان کی یاد کا تنہائیوں میں ہے
۔۔۔۔۔
عارفؔ کی لاج آپ کے ذمہ ہے حشر میں
یہ بھی حضور آپ کے شیدائیوں میں ہے

******