حاضری

درِ سرکار پر ہم حاضری کو گھر سے جب نکلے
تمنا آرزو ارمان خواہش سب کے سب نکلے

                                                                   یقیں محکم لئے سینے میں آقا کی شفاعت کا

                                                                  دلِ صد چاک و چشمِ اشکبار و جاں بلب نکلے
نگاہیں جب اٹھیں اپنی بسوئے گنبدِ خضریٰ                                                                
درودِ پاک کے نذرانے دل سے سوئے لب نکلے                                                              
                                                                 عجب کچھ کیفیت تھی دل کی پیشِ جالیء اقدس
                                                         یہ حسرت تھی دمِ آخر نکلنا ہو تو اب نکلے
زباں یوں چپ ہوئی کچھ عرضِ حاجت بھی نہ کر پائی                                                   
میں حیراں تھا مرے نالے بھی کتنے با ادب نکلے                                                             
                                                                                     مگر اس در پہ حاجت بھی نہ تھی کچھ عرضِ حاجت کی            
                                                                       طلب کیا کیجئے جب سارے مطلب بے طلب نکلے
جو پنہچا روضہء جنت میں دل میں یہ خیال آیا                                                              
جو جنت میں گئے اک بار باہر پھر وہ کب نکلے                                                              
                                                                              جھکایا جب رسول اللہ کی چوکھٹ پہ سر میں نے           
                                                                           نہ جانے کیوں مری آنکھوں سے آنسو بے سبب نکلے
ہزاروں جاں نثاروں نے بقیع میں گر جگہ پائی                                                             
  وہیں پر ایک مرقد اپنی بھی پھر کیا عجب نکلے                                                                   
                                                           مدینہ کھینچ لاتی ہے ہمیں نسبت غلامی کی 
                                                             خدا کی شان ہم کمتر بھی کیا والا حسب نکلے
پریشاں حال تھا میں کثرتِ عصیان سے عارفؔ 
مدینہ میں بہر سو رحمتِ حق کے سبب نکلے
******

سرکار بلاتے ہیں
                                                                       کہتا ہے یہ دل ہر پل سرکار بلاتے ہیں      
چل سوئے مدینہ چل سرکار بلاتے ہیں                                      
                                                                  بے چین نگاہوں سے ہر آج یہ کہتا ہے
بے چین نہ ہونا کل سرکار بلاتے ہیں                                      
                                                                    مخمور فضائیں ہیں رحمت کی گھٹائیں ہیں
کہتے ہیں گھنے بادل سرکار بلاتے ہیں                                       
                                                                   ہر وقت تصور میں طیبہ کے نظارے ہیں
ہوتا ہے گماں پل پل سرکار بلاتے ہیں                                    
                                                                  رکھتے ہیں خبر ہردم وہ اپنے غلاموں کی
ہم ہوتے ہیں جب بیکل سرکار بلاتے ہیں                                 
                                                             جانا درِ آقا پر ہر زخم کا مرہم ہے
دل ہوتا ہے جب گھائل سرکار بلاتے ہیں                             
                                                                   وہ بحرِ سخاوت ہیں وہ چشمہء رحمت ہیں
بھرنے کو مری چھاگل سرکار بلاتے ہیں                                
                                                                         خاکِ درِ طیبہ کی خواہش ہے تو چل‘ چل کر
پیشانی پہ اپنی مل سرکار بلاتے ہیں                                      
                                                                     احساسِ طرب بھی ہے پر پاسِ ادب بھی ہے
جذبات میں ہے ہلچل سرکار بلاتے ہیں                                 
                                                              دل فرطِ مسرت سے قابو میں نہیں آتا
ہوجائیں نہ ہم پاگل سرکار بلاتے ہیں                                     
ہیں حاضرِ در عارفؔ یہ ان کی عنایت ہے
اپنے میں نہیں کچھ بل سرکار بلاتے ہیں
******