منتخب کلامِ 

حضرت علامہ مفتی سید عبد الرشید قادری اخترؔ علیہ الرحمہ

۔۔۔۔۔۔۔۔۔۔۔۔۔


                                      گنہہ ایسے دھلیں کافور سب کا ہوش ہوجاتا

                             ترے دریائے رحمت کو ذرا سا جوش ہوجاتا

                                                                      

                                                                   مئ عشقِ نبی  سے دل  مرا مدہوش  ہوجاتا

                              کبھی بیدار ہوجاتا  کبھی  بے ہوش  ہوجاتا


                                                                   تری زلفِ رسا بڑھ کر قریبِ دوش ہو جاتی 

                             مرا سر جھکتے جھکتے بوسہء پاپوش ہوجاتا


                                                                    شفیع المذنبیں حق نے کیا ائے رحمتِ عالم   

                              قبائے مغفرت  میرے  لئے سرپوش  ہوجاتا


                                                                    سنوں آوازِ احمد دیکھ لوں میں جلوہء احمد

                              الٰہی ایسی صورت کا یہ چشم و گوش ہوجاتا


                                                  بنوں میں تارکِ دنیا فقیری بھیس لوں اخترؔ

                                                   تمنا ہے مدینہ چل  کے کمبل پوش  ہوجاتا

                                                                       ۔۔۔۔۔۔۔۔۔


        (دیگر)


                                                                    ہے  ولولہء  عشقِ نبی  میرے  بدن  میں

                                   حاجت نہیں خوشبو کی مرے قبر و کفن میں


                                                                    لکھتا  ہوں  ثنا  زلفِ  شہنشاہِ عرب  کی

                                   بو مشکِ ختن کی ہے زباں اور دہن میں


                                                                    لے جاتے ہیں تعظیم سے آ آ  کے ملائک

                                   یہ فیض ہے واللہ مرے شعر و سخن میں


                                                                 صحرائے مدینہ کا ازل سے ہوں میں وحشی

                                   دل خاک لگے گا مرا جنت کے چمن میں


                                                                       بلوایئے  اس  اخترِؔ  کمتر  کو   مدینہ

                                    دل اس کا بہلتا نہیں یارانِ وطن میں

                                                                       ۔۔۔۔۔۔۔۔۔۔


                                                                      (دیگر)


                                                                   آنکھوں سے رواں اشک ہیں اور آہِ رسا بھی

                                   پانی جو برستا ہے تو چلتی ہے ہوا بھی


                                                                   اللہ   غنی   شان   ترے   دستِ   کرم   کی

                                   ہیں دست نگر سب  امرا  بھی فقرا بھی


                                                                 ہے صلحِ کل‘ انسان کی فطرت میں ہیں اضداد

                                   آتش بھی ہے پانی بھی ہے مٹی بھی ہوا بھی


                                                                 دنیا  سے  چلے  بعد  بھی  ہیں  اور  منازل

                                   میزان بھی ہے پل بھی ہے اور روزِ جزا بھی


                                                                 مستغنی  مجھے  کردیا  یوں  عشقِ  نبی  نے

                                   خاشاک  ہے نظروں میں مری بالِ ہما بھی


                                                                 جو تجھ سے طلب تجھ کو کرے ہے یہ توکل 

                                   دنیا کی غرض سے نہ اٹھیں دستِ دعا بھی


                                                                دوزخ بھی ہو بے کار رہے کوئی نہ اس میں

                                   رحم آپ کے دل میں اگر آجائے ذرا بھی


                                                                تو بخشے نہ مجھ  کو  تو  کہاں  جاؤں  الٰہی

                                   بتلادے مجھے اور کوئی تیرے سوا بھی


                                                                فرمائے گا  خود  سن  کے  عمل نامہء  اخترؔ

                                   ٹہرا ہے تو کیوں سامنے‘ فردوس میں جا بھی


                                                                      ۔۔۔۔۔۔۔۔۔۔